Sulmuesi i skuadrës së Flamurtarit, Artan Gashi, një ditë pas fitores së Flamurtarit në Gjilan, ka thënë se kjo fitore i ka hapur rrugën drejt titullit të kampionit skuadrës “kuqezi”.

“Skuadra e Gjilanit ka një skuadër të fortë, por ne me një lojë kolektive dhe me një angazhim të madh arritëm t’i marrim tri pikë mjaft të vlefshme. Edhe pse ne nuk synojmë me çdo kusht të shpallemi kampionë, kjo fitore na ka hapur rrugën drejt titullit të kampionit”, ka thënë Artan Gashi, i cili ishte autor i golit të tretë për skuadrën e Jusuf Tortoshit.

Në takimin e radhës skuadra nga kryeqyteti do të përballet me skuadrën e Trepçës nga Mitrovica, por, sipas Gashit, fitorja është e vetmja alternativë për këtë takim.

“Nuk do të jetë lehtë, por ne do të shënojmë fitore në këtë takim. Në pranverë jemi duke luajtur mirë. E kemi merituar të fitojmë edhe në takimin e parë kundër Hysit, por fati nuk ishte në anën tonë”, ka shtuar ai.

Mungesa e Zejnullahut nuk po vërehet

Sulmuesi Artan Gashi është ndalur të flasë edhe për largimin e sulmuesit kryesor të skuadrës së Flamurtarit, Faton Zejnullahu. Gashi ka shprehur mendimin se mungesa e kapitenit nuk është duke u vërejtur të paktën në dy takimet e para.

“Thënë të drejtën nuk është duke u vërejtur mungesa e Fatonit, të paktën në këto dy javët e para. Mendoj se nuk do të vërehet as në takimet e radhës”, ka shtuar Gashi.

Skuadra e Flamurtarit, pas xhiros së nëntëmbëdhjetë, renditet në pozitën e tretë me 31 pikë.

Veton Zymberi