Kryesuesi i renditjes tabelore, Trepça, pas humbjes ndaj Prishtinës, javën e kaluar, të dielën në “Adem Jashari’, do të kërkojë pikët maksimale.

Trepça dhe Drenica, do të ballafaqohen të dielën në kuadër të Javës së 25-të të Raiffeisen Superliga e Kosovës në Futboll. “Xehetarët” që i prijnë tabelës më 41 pikë të tubuara, dy më shumë se Flamurtari (39), ndaj drenicasve kërkojnë trepikëshin e plot. Trajneri i Trepçës, Gani Sejdiu dy ditë para duelit më Drenicën, ka thënë se skuadra e tij tashmë nuk guxon ta gabojë, veçmas kur luan në shtëpi të vet. Sejdiu thotë se vetëm më fitore mbahet vendin e parë në renditjen tabelore.

“Ne nuk guxojmë tani e tutje të gabojmë në asnjë ndeshjes, sidomos në ato takim kur luajmë para publikut tonë. Jemi të përgatitur mirë dhe se, ndaj Drenicës, synojmë të marrim pikët e plota, në mënyrë që të mos rrezikojmë kreun e tabelës”, ka thënë Sejdiu. Ai ka pohuar se humbja ndaj Prishtinës, nuk ka ndikuar aspak në atmosferën e mirë në klub. Sipas tij, gabimet e lëshuar në duel më Prishtinën, nuk do të përsëritën më.

“Pas humbjes ndaj Prishtinës, ne kemi analizuar mirë gabimet tona dhe se, ato gabim do të mundohemi që në takimet e radhës të mos përsëritën. Në humbjen ndaj Prishtinës, ka ndikuar edhe fusha e papërshtatshme, mirëpo tashmë jemi të orientuar për duelin e radhës. Të gjitha jemi të mobilizuar mjaft mirë që të arrijmë fitore ndaj Drenicës”, tha Sejdiu.    

Lushtaku: Në Mitrovicë, nuk udhëtojmë më flamur të bardhë

Ndërkohë edhe homologu, i Sejdiut, Tahir Lushtaku trajner i Drenicës, është shprehur optimist se të përzgjedhurit e tij do të marrin rezultat pozitiv në duel më Trepçën. Sipas tij, Trepça, ka skuadër cilësore më lojtar që kanë emër në futbollin e Kosovës, por Lushtaku, thotë se skuadra e tij në Mitrovicë, nuk do të udhëtojë më flamur të bardhë.

“Natyrisht se pas fitores ndaj Besës, motivi në skuadrën tonë është rritur dhe se, tashmë jemi të gatshëm edhe për sfidën ndaj Trepçës, skuadër kjo që është lidere e tabelës dhe që në ekip ka futbollist të shquar të futbollit tonë. Ne në Mitrovicë, nuk udhëtojmë më flamur të bardhë”, ka thënë Lushtaku, i cili ka shtuar se edhe në Mitrovicë, do të kenë përkrahjen e tifozëve të tyre.

“Ne në çdo ndeshje kemi përkrahjen e madh të tifozëve tonë, kjo u pa edhe në takim më Besën. Tifozët vërtet po na mbështesin fuqishëm në çdo ndeshjes. Besoj se përkrahja e tyre nuk do të mungoj as në Mitrovicë dhe se, përkrahjen e tyre jam optimist se arrijmë rezultat të favorshëm edhe ndaj Trepçës. Dhe më një barazim do të isha i kënaqur”, ka thënë Lushtaku.  

Fatmir Bytyci