Tortoshi: Luajtëm dobët kundër KEK-ut

Trajneri i Flamurtarit, Jusuf Tortoshi e vlerëson si tejet negativ faktin që skuadra e tij e ka nisur stinorin pranveror me humbje para tifozëve të vet kundër KEK-ut, 1:2. Kuqezinjtë e kryeqytetit kishin shpresuar që do t’i arkëtonin tri pikë në këtë sfidë, por në fund dolën duarthatë dhe tashmë rrezikohen për rënie nga liga, pasi kanë një orar të papërshtatshëm. Javën e ardhshme udhëtojnë në Skenderaj në duel me Drenicën, kurse më pas si vendës luajnë me Hysin, skuadër kjo që synon titullin e kampionit. “Ndodhi ajo që nuk është dashur të ndodhë. Startuam me humbje dhe tash gjërat janë përkeqësuar edhe më shumë. Sinqerisht bëmë lojë të dobët kundër KEK-ut. Dështuam në të gjitha aspektet. Dështuan edhe ata futbollistë prej të cilëve pres shumë”, deklaroi Tortoshi, dhe vijoi: “Duhet të shohim përpara sepse nuk kemi kohë për të vajtuar. Do të mundohemi që nëse është e mundshme këtë humbje ta kompensojmë në ndeshjet e ardhshme. Jemi në situatë jo të mirë, por duhet t’i mbledhim forcat dhe të gjejmë rrugën e duhur”.