Ylli shqiptar i Dinamo Kievit, Admir Mehmedi së bashku me disa sponsorë të tjerë qytetit të Gostivarit ka vendosur të ndihmojë klubin e tij të vendlindjes, KF Gostivari, duke ua mbuluar harxhimet e përgatitjeve që do t’i zhvillojë skuadra shqiptare në Antalia të Turqisë.

“I tëre udhëtimi dhe qëndrimi e skuadrës në Antalia përkrahet nga Admir Mehmedi, pastaj Nagip Memedi, një biznesmen i njohur me vendbanim në Zvicër si dhe Remzi Abdullai, drejtor i Vardar Dolomit. Me këtë rast dëshiroj t’i falënderoj publikisht personat në fjalë”, deklaroi Vesel Memedi, kryetar i KF Gostivari.

Ekspedita e KF Gostivari për në Antalia do të niset me 4 shkurt me autobus të kompanisë transportuese nga Gostivari “Nasir Tours”, që është sponsor i udhëtimit.

“Kjo është një ndihmë e madhe për klubin për realizimin e ëndrrës së kamotshme të futbolldashësve në Gostivar”, theksoi Mehmedi, duke falënderuar publikisht përkrahësit e klubit.

Në Antali, skuadra do të zhvillojë  4 ndeshje kontrolluese me ekipe të njohura nga vende të ndryshme evropiane që poashtu gjenden në përgatitje në Antalia, ndërsa kundërshtarët do të bëhen të ditur në ditët në vijim.