Trajneri i Lushnjës, Ramadan Baballëku, ka debutuar në mënyrë fantastike në stolin verdhëjeshil, duke dhuruar me skuarën e tij spektakël dhe gola për publikun e “Roza Haxhiut”. Tekniku verdhëjeshil ka qënë në një merak të madh, sepse rikthehej në drejtimin e verdhëjeshilëve pas 12 -vjetësh. Gjatë kësaj ndërprerje ka qënë vetëm dy herë si zv/trajner te Lushnja, duke u përqëdruar në futbollin e moshave. Në mungesë të përgjegjësive të mëdha, premiera e Baballëkut ka vënë në siklet edhe klubin, si dhe mbështesit e verdhëjeshilëve. 90 minutat e para kanë qënë jashtë çdo parashikimi. Nuk kishte mënyrë më të mirë për ish-mesfushorin e fundviteve '70, që “rrëzoi në tapet” skuadrën e plejofit të edicionit të kaluar.

“Nuk është e lehtë të fitosh në fushë me këtë rezultat. E kemi qarkulluar topin në mënyrë të sigurtë dhe pa probleme. Më duhet të pranoj, që 15-minutat e fundit kanë qënë e jashtëzakonshme. Ndikuan dy zëvendësimet dhe përgatitja e mirë atletiko-fizike që ka skuadra. Kemi luajtur në presing dhe pavarësisht golave që vinin njëri pas tjetrit e kemi mbyllur ndeshjen në sulm”, u shpreh trajneri Baballëku.

“Kur skuadra shënon dhe arrin goleadë, vetëkënaqësia është e pashmangshme. Lind euforia natyrshëm pas rezultatit. Duke parë mangësitë e vogla, në ndeshjen e rradhës do të përgatitemi për t'i eliminuar ato. Kemi një takim të fortë në Vlorë, ndaj një skuadre që duhet vlerësuar maksimalisht. Tashmë do të shikojmë, sesi do të jemi jashtë shtëpisë”, u shpreh trajneri Baballëku.