Prishtina ka fituar derbin kosovar të zhvilluar në Kukës dhe bëhet skuadra e katërt që kualifikohet në gjysmëfinalet e Kupës Pavarësia.

Skuadra e drejtuar nga Afrim Tovërlani ka mposhtur rivalët e Trepça 89’ pas ekzekutimit të 11-metërshave me rezultatin 6:5, pasi më parë koha e rregullt e takimit përfundoi në barazim 0-0.

Skuadra prishtinase luajti më mirë se kundërshtarët nga Mitrovica, edhe sepse këta të fundit kanë luajtur për shumë minuta në inferioritet numerik, pas kartonit të kuq të Blerim Berishës.

Ekzekutimet nga pika e penalltisë i buzëqeshën Prishtinës, që gjatë ndeshjes ka qenë disa herë pranë golit, por fati nuk ka qenë më ta. Heroi i skuadrës së kryeqytetit kosovar ishte portieri Kushtrim Mushica.

Ai jo vetëm që priti një 11-metërsh të Maxhunit, por më pas mori përsipër ekzekutimin e një penalltie, dhe me një goditje të saktë i dhuroi skuadrës së tij kualifikimin.

Me këtë kualifikim, Prishtina plotëson kuadrin e skuadrave gjysmëfinaliste në Kupën Pavarësia. Më parë të kualifikuara mes katër më të mirave ishin Flamurtari si skuadër organizatore, skuadra shqiptare nga maqedonia e Shkëndijës së Tetovës dhe Tirana që fitoi përballë Otranto nga Ulqini.

Faza përfundimtare e turneut që është ideuar si një festë, edhe prej 100-vjetorit të Pavarësisë do të zhvillohet në qytetin e Vlorës, më 27 nëntor.