Xhevahir Sukaj konfirmon momentin e mirë te Sepahan Isfahan, duke shënuar edhe golin e dytë në Champions League-n aziatike. Sulmuesi shqiptar ishte autor i golit të parë të skuadrës së tij, në fitoren 2-1 përballë sauditëve të Al Ahlisë.

Shkodrani 24-vjeçar shënoi golin e parë të ndeshjes në minutën e 19-të, ku i shpëtoi bukur mbulimit të mbrojtjes dhe pas kontrollit perfekt të topit mposhti portierin me një goditje në kufi të zonës. Ky ishte goli i katërt sezonal për Sukajn dhe i dyti në Champions-in aziatik. Shkodrani zevendesohet ne minuten e 50-te, nga Seyedsalehi.

Al Ahli arriti të barazonte përkohësisht shifrat me rrjetën e Imad Ali në minutën e 63-të, megjithatë Sepahani e fitoi takimin pas golit të mbrojtësit Bengar, kur kishin mbetur edhe vetëm pesë minuta lojë.

Kjo ishte ndeshja e fundit në fazën e grupeve dhe me triumfin 2-1 përballë rivalëve direkt, Sepahani siguroi vendin e parë në Grupin C të Champions League-s aziatike, me 13 pikë të grumbulluara në 6 ndeshje të luajtura.

Tashmë, kampionët e Iranit për sezonin 2011-2012 do të luajnë në fazën e 1/8-ve me skuadrën që do të renditet e dyta në Grupin A, ku në garë janë iranianët e Esteghlal dhe Al Rajan nga Katari.

Kel Naraci